విషప్రయోగం చేస్తే... తప్పించుకోలేరు!

ఓ హంతకుడు విష ప్రయోగంతో హత్య చేశాడనుకుందాం. లేదా హత్య చేసేటప్పుడు మద్యం మత్తులో ఉన్నాడను కుందాం. ఈ విషయాలని కేవలం వాళ్ళ వేలిముద్రల్ని బట్టి తెలుసుకునే అవకాశం ఇప్పటిదాకా లేదు. అదే సాధ్యమైతే పోలీసులకి ఎంతో సమయం ఆదా అవుతుంది.  కానీ- ప్రస్తుతమున్న వేలిముద్రల విశ్లేషణలో అవి బయటపడే అవకాశం లేదు. ప్రస్తుతం ఆ ముద్రలు తీయడానికి ప్రపంచవ్యాప్తంగా ‘జిలెటిన్‌’ రసాయనంతో చేసిన ‘లేయర్స్‌’ని వాడుతున్నారు. ఈ జిలెటిన్‌- ఇతర రసాయనాల అవశేషాల్ని కప్పేస్తుంది కాబట్టి దోషులు విషమో మద్యమో వాడిన సంగతి బయటపడదు. అందుకు ఓ సరికొత్త పద్ధతిని ఆవిష్కరించారు యూకేలోని లఫ్‌బరో విశ్వ విద్యాలయం పరిశోధకులు. పోలీసులు తీస్తున్న వేలిముద్రల్లో- నిందితులు అదివరకు వాడిన రసాయనాల అవశేషాల్ని పసిగట్టే ‘మాస్‌ స్పెక్ట్రోమెట్రీ’ అన్న పద్ధతిని ఆవిష్కరించారు.  పోలీసుల దర్యాప్తుకి ఇది ఎంతో ఉపయోగ పడుతుందనీ, వేలిముద్రల ప్రాధాన్యాన్ని మరింత పెంచుతుందనీ వారు చెబుతున్నారు.