‘వాపు’ రహస్యం తెలిసిందోచ్‌!

కరోనాతో కోట్లాది మరణాలు చోటుచేసు కున్నాయని మనం ఇట్టే చెప్పేస్తుంటాం కానీ... నిజానికి ఆ మరణాలకి కారణం- కొవిడ్‌ కాదు, ఆ వైరస్‌ని చూసి అతిగా స్పందించిన మన రోగనిరోధక వ్యవస్థ. దగ్గు, శ్వాస అందకపోవడం, ఊపిరితిత్తుల్లో అల్లకల్లోలం... ఇవన్నీ ఆ స్పందనలో భాగాలే. ‘సైటోకైన్‌ స్టార్మ్‌’ అనేవారు అప్పట్లో ఈ లక్షణాలని. మనం కిందపడి కాలోచేయో దెబ్బతగిలితే అక్కడ వెంటనే వాపు వస్తుంది కదా... ఇది కూడా అలాంటిదే. ఈ స్పందనలనే... స్థూలంగా ‘ఇన్‌ఫ్లమేషన్‌’(వాపు స్వభావం) అంటారు. ఓ స్థాయి వరకూ ఇది మనకు మంచే చేస్తుందికానీ- శ్రుతిమించితే మాత్రం ఎన్నో ఇబ్బందులకి కారణ మవుతుంది. అందుకే దీని రహస్యాన్ని పట్టుకోవాలని శాస్త్రవేత్తలు ఎంతోకాలంగా చేస్తున్న పరిశోధనలు ఇప్పుడు ఓ ముఖ్యమైన మైలురాయిని చేరుకున్నాయి. కొలంబియాకి చెందిన శాస్త్రవేత్తలు- మెదడు కాండం(బ్రెయిన్‌ స్టెమ్‌- మెడపైభాగాన్నీ మెదడునీ కలిపే భాగం)లో ఉన్న ‘సీఎన్‌ఎస్‌టీ’లోని న్యూరాన్లే ఈ ఇన్‌ఫ్లమేషన్‌ని కలిగిస్తున్నాయని కనిపెట్టారు. ఎలుకల్లో జరిగిన పరిశోధనల్లో వీటి పాత్రని స్పష్టంగా చూడగలిగారట. ఎయిర్‌కండిషనర్‌లో చల్లదనాన్ని నియంత్రించినట్టే ఇవి మన ఇన్‌ఫ్లమేషన్‌ని నియంత్రిస్తున్నాయని వాళ్ళు చెబుతున్నారు.