హృద్రోగ నివారణకు నారింజ తొక్క!

చిన్నప్పుడు ఈ అనుభవం మనందరికీ ఉండే ఉంటుంది- నారింజో కమలాలో... వాటి తొక్కని లోపలివైపు మడిచి మడవంగానే పైకి చిమ్మే రసాన్ని పక్కవారి కళ్ళలోకి వేసి ఆ మంటకి వాళ్ళు ‘అబ్బా’ అంటుండగా నవ్వుతూ పరుగెత్తేస్తాం. కాస్త పెద్దయ్యాక- ఆ తొక్కతో చర్మానికి కొత్త మెరుపేదో వస్తుందని దాన్ని మొహానికి రుద్దుకుంటూ ఉంటాం. ఇప్పుడు ఆ రసంలోనే హృద్రోగాన్ని నివారించే గుణముందని చెబుతున్నారు అమెరికాలోని ఫ్లోరిడా వర్సిటీ శాస్త్రవేత్తలు. ముఖ్యంగా అందులో ‘ప్యురులోయల్‌ ప్యుట్రాసిన్‌’ అనే రసాయన సమ్మేళనం ఉందట. అది గుండెపోటుకి ఎలా విరుగుడుగా మారుతోందంటే- మనం తిన్న ఆహారం జీర్ణమవడానికి సూక్ష్మక్రిములు కొన్ని సాయపడుతుంటాయి. అలా సాయపడే బ్యాక్టీరియా ఒకటి... ట్రైమిథిలైన్‌-ఎన్‌-ఆక్సైడ్‌ (టీఎంఏఓ) అనే రసాయనాన్ని ఉత్పత్తి చేస్తుంటుంది. ఈ టీఎంఏఓ ఉత్పత్తి అవసరానికన్నా ఎక్కువ ఉన్నవారిలో గుండెపోటు ప్రమాదం రెండురెట్లు ఎక్కువని ఇదివరకే గుర్తించిన శాస్త్రవేత్తలు- దాని ప్రభావాన్ని కట్టడిచేసే వివిధ పదార్థాల కోసం అన్వేషణ చేస్తూ వస్తున్నారు. అందులో భాగంగానే తాజాగా నారింజ తొక్కలోని ప్యురులోయల్‌ ప్యుట్రాసిన్‌... టీఎంఓని సమర్థంగా నిలువరిస్తుందని తేల్చారు. వెంటనే మందుల తయారీకీ నడుంబిగించేశారు కూడా!