Tirumala: తిరుమలలో కొనసాగుతున్న భక్తుల రద్దీ

సర్వదర్శనానికి 30 గంటల సమయం

ఆళ్వార్‌ ట్యాంక్‌ సమీపంలోని సర్వదర్శనం క్యూలైన్‌లో వేచి ఉన్న భక్తులు

తిరుమల, న్యూస్‌టుడే: తిరుమలలో శ్రీవారి సర్వదర్శనానికి భక్తుల రద్దీ కొనసాగుతోంది. శనివారం ఉదయం రద్దీ కొంతమేర తగ్గినా సాయంత్రానికి మళ్లీ పెరిగింది. సమయ నిర్దేశిత సర్వదర్శనం (టైంస్లాట్‌) టోకెన్లు లేకుండా తిరుమలకు వచ్చిన భక్తులతో వైకుంఠం క్యూకాంప్లెక్స్‌లోని కంపార్ట్‌మెంట్లు, నారాయణగిరి షెడ్లు నిండిపోయి శిలాతోరణం వరకు వేచి ఉన్నారు. వీరికి శ్రీవారి దర్శనానికి దాదాపు 30 గంటల సమయం పడుతుండగా, రూ.300 ప్రత్యేక ప్రవేశదర్శనం టికెట్లు కలిగిన భక్తులకు మూడు గంటల సమయం పడుతోందని తితిదే తెలిపింది. శుక్రవారం శ్రీవారిని 70,668 మంది భక్తులు దర్శించుకోగా రూ.3.64 కోట్ల హుండీ కానుకలు లభించాయి. ఆదివారం రద్దీ మరింత పెరిగే అవకాశం ఉండటంతో తితిదే వీజీవో నందకిషోర్, ఏవీఎస్‌వోలు గిరిధర్, శివయ్య క్యూలైన్లను పరిశీలించి ముందు జాగ్రత్త చర్యలు చేపట్టారు.