లేపాక్షి చిత్ర, శిల్పకళా సౌందర్యం అద్భుతం

ఆలయాన్ని సందర్శించిన జీ-20 ప్రతినిధులు

లేపాక్షి, హిందూపురం అర్బన్‌, న్యూస్‌టుడే: విజయనగర రాజుల కాలంలో నిర్మించిన లేపాక్షి ఆలయంలోని పురాతన చిత్ర, శిల్పకళా సౌందర్యం ఎంతో అద్భుతంగా ఉందని జీ-20 దేశాల ప్రతినిధులు పేర్కొన్నారు. ఇంతటి శిల్ప సంపదను తాము ఎక్కడ చూడలేదని వారు సంతోషాన్ని వ్యక్తం చేశారు. కర్ణాటక రాష్ట్రం పావగడ నుంచి శ్రీసత్యసాయి జిల్లాలోని లేపాక్షి ఆలయాన్ని మంగళవారం సాయంత్రం 29 మంది జీ-20 ప్రతినిధులు సందర్శించారు. ఈ సందర్భంగా ఆలయం వద్ద వారికి కలెక్టర్‌ బసంత్‌కుమార్‌, పెనుకొండ సబ్‌కలెక్టర్‌ కార్తీక్‌, పురావస్తుశాఖ ఉన్నతాధికారులు పుష్పగుచ్ఛాలు అందించగా వేదపండితులు పూర్ణకుంభంతో ఘనస్వాగతం పలికారు. ఆలయం ప్రాశస్త్యం, చరిత్ర, నిర్మాణ కట్టడాలు, ప్రాధాన్యం, తైలవర్ణ చిత్రాలు, శిల్ప సంపద, వాస్తు నిర్మాణశైలి, ఏడుశిరస్సుల నాగేంద్రుడు, నాట్యమండపం, సీతమ్మపాదం, వేలాడే స్తంభం తదితర 680 స్తంభాల వివరాలను పురావస్తుశాఖ అధికారులు వారికి వివరించారు. ఆలయంలో వేలాడే స్తంభాన్ని చూసి ఆశ్చర్యచకితులయ్యారు. రాతిపై రాసిన తెలుగుశాసనాలు, జఠాయువు పక్షి విగ్రహాన్ని పరిశీలించారు. ఏకశిల నందీశ్వరుడిని తిలకించి ఈ దృశ్యాలను సెల్‌ఫోన్లలో బంధించారు. దాదాపు గంటసేపు ఆలయంలో గడిపారు.