AP Roads: ఆంధ్రాలో గుంతలు.. ఒడిశా మరమ్మతులు

కొమరాడ, న్యూస్‌టుడే: పార్వతీపురం మన్యం జిల్లా పార్వతీపురం నుంచి కొమరాడ మండలంలోని కూనేరు వెళ్లే రాష్ట్ర రహదారి గుంతలు పడటంతో వాహనదారులు అవస్థలు పడుతున్నారు. ఇటీవల ఈ ప్రాంతంలో గుంతల్లో లారీలు కూరుకుపోయి గంటల కొద్దీ వాహనాల రాకపోకలు నిలిచిపోయాయి. వాహనాలు దెబ్బతింటున్నా రాష్ట్ర ప్రభుత్వం ఎలాంటి చర్యలు చేపట్టలేదు. దీంతో ఈ మార్గంలో రాకపోకలు సాగించే ఒడిశాలోని రాయగడకు చెందిన లారీ అసోసియేషన్‌ సభ్యులు ముందుకు వచ్చారు. ఆదివారం జేసీబీ సాయంతో రోడ్డును తవ్వించి రెండు లారీల పిక్కరాయి వేసి చదును చేశారు. రాయగడ లారీ సంఘం నాయకుడు కొండబాబు మాట్లాడుతూ.. ఆంధ్రాలో రోడ్లు అధ్వానంగా మారడంతో లారీలు దెబ్బతింటున్నాయన్నారు. సమయంతో పాటు డబ్బులు వృథా అవుతున్నాయని వివరించారు. ఒడిశా, హైదరాబాద్‌, తమిళనాడు, కర్ణాటక, ఆంధ్రాలో లారీలతో వెళ్తుంటామని.. ఎక్కువగా పార్వతీపురం-కూనేరు దారిలోనే ఇబ్బందులు పడుతున్నామని చెప్పారు. ఇక్కడ యంత్రాంగం స్పందించకపోవడంతో రాయగడ సంఘం తరఫున పనులు చేశామన్నారు.