ఈ దారిలో వెళ్లాలంటే.. క్రేన్లు తీసుకెళ్లాలి!

పార్వతీపురం మన్యం జిల్లాలో మక్కువ నుంచి సాలూరుకు వెళ్లే రోడ్డులో సొంత వాహనంలో ప్రయాణం చేస్తున్నారా? అయితే.. రెండు మూడు స్టెప్నీలు, ఓ మెకానిక్‌, ఇంకా అవసరమైతే క్రేన్లూ అందుబాటులో ఉండేలా చూసుకోండి. ఎందుకంటే ఈ మార్గం అంత దారుణంగా ఉంటుంది. మొత్తం 18 కి.మీ. పొడవే. పేరుకు తారు అయినా.. మట్టి రోడ్డు కన్నా అధ్వానంగా ఉంది. రోజుకో వాహనం ఈ మార్గంలో దిగబడుతోంది. ఏడాది క్రితం పాయకపాడు గ్రామ సమీపంలో రోడ్డు మధ్యలో గుంత పడింది. దాన్ని పూడ్చకపోవడంతో పెద్దగా మారింది. పొలాల మీదుగా వచ్చిన నీరు ఆ గుంతలో నిలుస్తోంది. వాహనాలు అందులో దిగబడుతున్నాయి. శుక్రవారం ఓ కారు కూరుకుపోయింది. కారు యజమాని స్థానికులను సాయమడిగితే వచ్చి అతికష్టం మీద దాన్ని బయటికి లాగారు. పోయిన గురువారం, గత నెల 27న లారీలు దిగబడితే.. వాటిని లాగేందుకు క్రేన్లు తెప్పించాల్సి వచ్చింది.

న్యూస్‌టుడే, మక్కువ