వైకాపా ఎమ్మెల్సీ జయమంగళ మూడో వివాహం

కైకలూరు, న్యూస్‌టుడే: వైకాపా ఎమ్మెల్సీ జయమంగళ వెంకటరమణ మూడో వివాహం చేసుకున్నారు. కుటుంబ సభ్యులు, సన్నిహితుల మధ్య జరిగిన ఈ వివాహానికి ఎమ్మెల్సీ రెండో భార్య, కుమారుడు పెళ్లి పెద్దలుగా వ్యవహరించారు. వెంకట రమణ అటవీశాఖ ఏలూరు రేంజ్‌లో సెక్షన్‌ అధికారిణి సుజాతను సోమవారం ఏలూరు జిల్లా కైకలూరు సబ్‌ రిజిస్ట్రార్‌ కార్యాలయంలో వివాహం చేసుకున్నారు. ఆయన రెండో భార్య సునీత సాక్షి సంతకం చేశారు. గతంలో వెంకట రమణకు రెండు వివాహాలు జరిగాయి. మొదటి భార్య అనారోగ్యంతో చనిపోగా..ఆమెకు ఒక కుమార్తె ఉన్నారు. తరవాత కైకలూరు ప్రాంతానికి చెందిన సునీతను రెండో వివాహం చేసుకోగా ఆమెకు కుమార్తె, కుమారుడు ఉన్నారు. 2009లో ఎమ్మెల్యేగా గెలిచిన అనంతరం ఇరువురి మధ్య మనస్పర్థలు రావడంతో దూరంగా ఉంటున్నారు. ఈ క్రమంలో కొన్నేళ్ల కిందట విడాకులు తీసుకున్నారు. అప్పటి నుంచి సునీత విజయవాడలో ఉంటున్నప్పటికీ పిల్లలతో కలిసి జయమంగళ ఇంటికి వచ్చి వెళ్తున్నారు. రెండో భార్య, పిల్లల అంగీకారంతోనే జయమంగళ మూడో వివాహం చేసుకున్నట్లు కుటుంబ సభ్యులు తెలిపారు. ప్రస్తుతం వివాహం చేసుకున్న సుజాతకు ఇది రెండో వివాహం. ఆమెకు ఒక కుమారుడు ఉన్నారు.