నేడు తిరుమలకు చంద్రబాబు

ఈనాడు డిజిటల్‌, అమరావతి; న్యూస్‌టుడే, తిరుమల, కుప్పం: తెదేపా అధినేత చంద్రబాబు కుటుంబసభ్యులతో కలిసి శుక్రవారం తిరుమల శ్రీవారిని దర్శించుకోనున్నారు. గురువారం మధ్యాహ్నం హైదరాబాద్‌లోని రాజీవ్‌గాంధీ అంతర్జాతీయ విమానాశ్రయం నుంచి తిరుపతి చేరుకుంటారు. ఆ రాత్రికి తిరుమల కొండ పైనున్న శ్రీగాయత్రి నిలయంలో బస చేస్తారు. శుక్రవారం ఉదయం 7.30 గంటలకు శ్రీవారిని దర్శించుకుంటారు. ఉదయం 10.30 గంటలకు రేణిగుంట విమానాశ్రయం నుంచి అమరావతికి బయలుదేరుతారని తెదేపా ఓ ప్రకటనలో పేర్కొంది.

రెండో వారంలో కుప్పం పర్యటన

మరోవైపు చంద్రబాబు తన సొంత నియోజకవర్గమైన చిత్తూరు జిల్లా కుప్పం నియోజకవర్గంలో డిసెంబరు రెండో వారంలో పర్యటించనున్నట్లు పార్టీ వర్గాలు తెలిపాయి. తిరుమల, శ్రీశైలం, సింహాచలంతోపాటు విజయవాడ కనకదుర్గమ్మ ఆలయాల దర్శనానంతరం.. ఈ పర్యటన ఉంటుందని సమాచారం.