సాగర్‌ వద్ద సాధారణ పరిస్థితులు

ముళ్లకంచెను తొలగించిన పోలీసులు
ఏపీ భూభాగంలోకి కేంద్రబలగాలు

ఈనాడు డిజిటల్‌-నరసరావుపేట, న్యూస్‌టుడే-విజయపురిసౌత్‌: నాగార్జునసాగర్‌ జలాశయం వద్ద పరిస్థితులు యథాస్థితికి వచ్చాయి. నవంబరు 29కి ముందునాటి వాతావరణం నెలకొంది. ఆదివారం ఆంధ్రా భూభాగంలోకి కేంద్ర బలగాలు వచ్చి ప్రాజెక్టును తమ ఆధీనంలోకి తీసుకున్నాయి. 13వ గేటు వరకూ వేసిన ముళ్ల కంచెను, బారికేడ్లను తొలగించారు. ఎన్నెస్పీ అధికారులు, కేంద్ర బలగాలు, ఆంధ్ర, తెలంగాణ పోలీసులు డ్యాంపై సమావేశమై నీటి వాటాలపై చర్చించుకుని బలగాలను పూర్తిగా ఉపసంహరించుకోవాలని నిర్ణయానికి వచ్చారు. దీంతో ఇరువైపులా పోలీసు బలగాలు తిరుగుముఖం పట్టడంతో అందరూ ఊపిరి పీల్చుకున్నారు. ఈ నెల 6వ తేదీన కృష్ణా నదీ యాజమాన్య బోర్డు సమావేశం దిల్లీలో జరగనుందని, బోర్డు నిర్ణయం మేరకు నడుచుకుందామని ఇరు రాష్ట్రాల సాగర్‌ అధికారులు మాట్లాడుకున్నారు. జలాశయం పరిధిలో కేంద్ర బలగాలే ఉండాలని, పోలీసు బలగాలు వెనక్కి వెళ్లిపోవాలని కేంద్ర హోంశాఖ సూచనలు పాటించాలన్న విషయంపై ఏకాభిప్రాయానికి వచ్చారు. ఏపీ భూభాగంలోని డ్యాం పాయింట్లను పూర్తిగా కేంద్ర బలగాలు స్వాధీనం చేసుకున్నాయి. కేంద్రం రంగంలోకి దిగడంతో సమస్య తాత్కాలికంగా సద్దుమణిగింది.