చంద్రబాబు బెయిల్‌ పిటిషన్లపై విచారణ 12కి వాయిదా

ఈనాడు, అమరావతి: ఉచిత ఇసుక విధానం, రాజధాని అమరావతి ఇన్నర్‌ రింగ్‌ రోడ్డు వ్యవహారంలో తెదేపా అధినేత చంద్రబాబుపై సీఐడీ కేసులు నమోదు చేసిన సంగతి తెలిసిందే. ఈ కేసుల్లో ముందస్తు బెయిలు కోసం ఆయన దాఖలు చేసిన వ్యాజ్యాలపై హైకోర్టులో విచారణ ఈ నెల 12కి వాయిదా పడింది. సీఐడీ తరఫున వాదనలు వినిపించేందుకు ఏజీ శ్రీరామ్‌ హాజరు అవుతారని.. విచారణను 12వ తేదీకి వాయిదా వేయాలని అదనపు పీపీ దుష్యంత్‌రెడ్డి కోరారు. దీంతో విచారణను వాయిదా వేస్తూ న్యాయమూర్తి జస్టిస్‌ టి.మల్లికార్జునరావు బుధవారం ఉత్తర్వులు జారీచేశారు. ఈ వ్యాజ్యాల్లో పిటిషనర్‌ తరఫున వాదనలు ఇప్పటికే ముగిసిన విషయం తెలిసిందే.