‘తూర్పు తీరంలో తెలుగు రేఖలు’ పుస్తకావిష్కరణ

ఈనాడు, దిల్లీ: ఆస్ట్రేలియా గడ్డపై తెలుగువారి ప్రస్థానానికి ప్రతిబింబమే ‘తూర్పు తీరంలో తెలుగు రేఖలు’ పుస్తకమని రచయిత మల్లికేశ్వరరావు కొంచాడ తెలిపారు. తెలుగు వారు ఆ ఖండానికి చేరి అరవై ఏళ్లు పూర్తయిందని, ఆ సందర్భంగా ఈ పుస్తకాన్ని తీసుకువచ్చానని ఆయన వివరించారు. దిల్లీలో కేంద్ర సాహిత్య అకాడెమీ కార్యదర్శి కె.శ్రీనివాసరావు, సుప్రీంకోర్టు న్యాయవాది రాజగోపాలరావు గురువారం ఆ పుస్తకాన్ని ఆవిష్కరించారు. అనంతరం రచయిత మల్లికేశ్వరరావు మాట్లాడుతూ తాను 1996లో న్యూజిలాండ్‌కు, తర్వాత 2001లో ఆస్ట్రేలియాకు వెళ్లానని తెలిపారు. నాటి నుంచి అక్కడి తెలుగు వారి ప్రస్థానాన్ని గమనిస్తున్నానని, ఈ క్రమంలోనే ఈ పుస్తకం రచించానని తెలిపారు. ఆస్ట్రేలియాలో తెలుగువారి ప్రస్థానం, అక్కడి తెలుగు ప్రముఖులు, తెలుగు సంస్థల కృషి తదితరాల గురించి వివరించినట్లు తెలిపారు.