రోజూ చేయి చాచడమేనా!

కాగ్‌ తేల్చిన జగన్‌ సర్కార్‌ అప్పుల చిట్టా!
ఏడాదంతా అప్పులే
ఏటేటా పెరిగిపోతున్న వడ్డీలు

 ఈనాడు-అమరావతి: ఆర్థిక నిర్వహణ ఎలా ఉండకూడదో జగన్‌ సర్కార్‌ను చూస్తే సరిపోతుందేమో! ఇదేం పద్ధతి అంటూ వైకాపా ప్రభుత్వ తీరును కాగ్‌ ఎప్పుడో ఎండగట్టింది. చేతిలో చిల్లిగవ్వ కూడా లేకుండా, ఖజానా ఖాతాలో కనీస నిల్వ కూడా లేకుండా ఏమిటీ అప్పులు.. చేబదుళ్లు అంటూ నిలదీసింది. కొంత జాగ్రత్తపడితే ఈ వడ్డీల బాధ తప్పుతుంది కదా.. అని సలహా కూడా ఇచ్చింది. రోజూ చేబదుళ్లు తీసుకుంటూ.. వడ్డీల రూపంలో వృథా ఖర్చులు చేస్తున్నారని విస్తుపోయింది. ఎప్పుడో 2021 లెక్కలు చూసిన తర్వాతే కాగ్‌ అలా చెప్పింది.  జగన్‌ సర్కార్‌ ఆ మాట వినకపోగా, మరింత ఎక్కువగా అప్పులు తెస్తూ.. వాటిపై భారీగా వడ్డీలూ చెల్లిస్తోంది. 2019-20లో ఏడాది మొత్తం 221 రోజులే ఇలా చేబదుళ్లు తీసుకుంటే.. నాలుగేళ్లు గడిచేసరికి ఏకంగా 341 రోజులు అప్పులతోనే కాలం గడిపే స్థితికి రాష్ట్రాన్ని దిగజార్చింది. అప్పు పుడితేనే ఉద్యోగులకు జీతాలు, పెన్షన్లు.. ఏ కార్యక్రమానికైనా నిధులివ్వాలంటే రుణం తీసుకోవాల్సిందే. ఆఖరికి ఉద్యోగులు రిజర్వు బ్యాంకు వెబ్‌సైట్‌ చూసుకుని, రాష్ట్రం అప్పు ఎప్పుడు తెస్తుంది.. ఎంత తీసుకుంటోంది.. మనకు జీతం ఎప్పుడు వస్తుంది అని లెక్కలు వేసుకునే రోజులు వచ్చాయి. ఒక ప్రణాళిక లేకుండా ఎప్పుడూ రిజర్వు బ్యాంకు నుంచి చేబదుళ్లు తీసుకుంటూ రాష్ట్ర ఖజానాను నడపాల్సి రావడంతో ఏటా వాటిపై చెల్లించే వడ్డీల భారమూ పెరిగిపోతోంది. సర్కార్‌ పెద్దలు మాత్రం అబ్బే.. అలాంటిదేం లేదంటారు. వైకాపా సర్కార్‌ అయిదేళ్ల కాలంలో నాలుగేళ్ల ఆర్థిక లెక్కలను కాగ్‌ ఖరారు చేసింది. వాటిని రాష్ట్ర శాసనసభలోనూ ప్రవేశపెట్టారు. ఏ ఏడాది ఎన్ని రోజులు చేబదుళ్లు, అప్పులు తీసుకువచ్చింది? ఎన్ని రోజులు ఓవర్‌ డ్రాఫ్ట్‌లో రాష్ట్రం మునిగిపోయింది అన్న లెక్కలు గమనిస్తే ముక్కున వేలేసుకోవాల్సిందే. బహిరంగ మార్కెట్‌, కార్పొరేషన్ల రుణాలు, పబ్లిక్‌ ఎకౌంట్‌ నుంచి వాడుకున్నవి కాకుండా వేసిన లెక్కలివి.

ఏమిటీ చేబదుళ్లు? ఓవర్‌ డ్రాఫ్ట్‌ కథాకమామిషు

• ఖజానాలో ఉండాల్సిన కనీస నగదు నిల్వ: రూ. 1.94 కోట్లు
• రాష్ట్ర ప్రభుత్వం బహిరంగ మార్కెట్‌ రుణాలు, గ్యారంటీలు ఇచ్చి కార్పొరేషన్ల ద్వారా తెచ్చే రుణాలే కాదు.. రోజువారీ నిర్వహణ కోసం రిజర్వు బ్యాంకు ఇచ్చే చేబదుళ్లు, ప్రత్యేక సదుపాయం రుణాలు కూడా తీసుకుంటుంది.
• ఓవర్‌డ్రాఫ్ట్‌ వెసులుబాటు వినియోగించుకుంటుంది. వీటిని ఎప్పటికప్పుడు తిరిగి చెల్లిస్తుండాలి. ఆ చేబదుళ్లకు వడ్డీలూ కట్టాలి. అదీ ఒక రకమైన అప్పే.
• రిజర్వు బ్యాంకు 3 తరహాలుగా ఈ రుణ వెసులుబాటు కల్పిస్తుంది. ప్రత్యేక డ్రాయింగ్‌ సదుపాయం, వేస్‌ అండ్‌ మీన్స్‌, ఓవర్‌ డ్రాఫ్ట్‌.
• రాష్ట్ర ఖజానాలో నిధులు లేకపోయినా, ప్రత్యేక డ్రాయింగ్‌ సదుపాయం కింద రూ.400 కోట్ల వరకు వాడుకోవచ్చు. ఈ మొత్తం మన రిజర్వు నిధిని బట్టి ఉంటుంది.
• ప్రత్యేక డ్రాయింగ్‌ సదుపాయం వాడేసుకున్న తరువాత కూడా రిజర్వు బ్యాంకు నుంచి చేబదుళ్లు తీసుకోవచ్చు. రూ.2,252 కోట్ల మేర ఇలా తీసుకోవచ్చు.
• ఆ మొత్తమూ వాడుకున్న తర్వాత   దాదాపు చేబదుళ్ల మొత్తమే ఓవర్‌ డ్రాఫ్ట్ట్‌గా వాడుకోవచ్చు.
• ఓడీలోకి వెళ్లిన తర్వాత 5 రోజుల్లోపు ఆ అప్పు మొత్తం ఆర్‌బీఐకి చెల్లించి బయటపడాలి.
• అలా చేబదుళ్లు, ప్రత్యేక డ్రాయింగ్‌ సదుపాయం సొమ్ములూ వెనక్కు చెల్లిస్తూ, మళ్లీ ఆ సదుపాయాల కింద అంతే మొత్తం వాడుకుంటూ నడిపిస్తూ ఉంటారు.
• ఈ చేబదుళ్లు తీసుకోకుండా ఆర్థిక నిర్వహణ సరిగ్గా చేసుకుంటే వడ్డీల భారాలు ఉండవు.

ఇవీ పరిమితులు..

• ఒక రాష్ట్రం లేదా కేంద్రపాలిత ప్రాంతం 14 రోజుల పాటు ఓవర్‌డ్రాఫ్ట్‌ వెసులుబాటును వినియోగించుకోవచ్చు.
• మూడు నెలల కాలంలో 36 రోజులకు మించి ఓడీ సౌకర్యం ఉండకూడదు.

జగన్‌ సర్కార్‌ అప్పుల చిట్టా ఇదీ (ఇలాంటి అప్పులు, వడ్డీలు, అప్పుల రోజులు ఎలా పెరిగిపోయాయో తెలిపే కాగ్‌ లెక్కలివి)