టెట్‌ హాల్‌టికెట్లు విడుదల

ఈనాడు, అమరావతి: ఉపాధ్యాయ అర్హత పరీక్ష(టెట్‌)కు 2,67,559 మంది దరఖాస్తు చేశారని, హాల్‌టికెట్లను వెబ్‌సైట్‌లో అందుబాటులో ఉంచామని పాఠశాల విద్యాశాఖ ప్రకటించింది. సెకండరీ గ్రేడ్‌ టీచర్స్‌(ఎస్జీటీ) పోస్టులకు బీఈడీ చేసిన వారు అనర్హులని హైకోర్టు స్పష్టం చేసిన విషయం తెలిసిందే. ఈ నేపథ్యంలో ఎస్జీటీ పోస్టులకు దరఖాస్తు చేసుకున్న బీఈడీ అభ్యర్థుల ఫీజును వారి బ్యాంకు ఖాతాల్లో జమ చేస్తామని వెల్లడించింది. పరీక్ష కేంద్రాల కేటాయింపుపై ఎలాంటి సందేహాలున్న జిల్లా విద్యాధికారి(డీఈఓ) కార్యాలయంలో సంప్రదించాలని సూచించింది. అభ్యర్థుల కోసం సహాయ కేంద్రాన్ని ఏర్పాటు చేశామని, 9505619127, 9705655349, 8121947387, 8125046997 ఫోన్‌ నంబర్లలో సంప్రదించాలని వెల్లడించింది.