పంటలు ఎండిపోతున్నాయ్‌.. విద్యుత్తు సరఫరా చేయండి

పార్వతీపురం మన్యం జిల్లాలో రైతుల ఆందోళన

మక్కువ, న్యూస్‌టుడే: విద్యుత్తు సరఫరా నిలిపివేస్తుండటంతో పంటలు ఎండిపోతున్నాయని రైతులు ఆగ్రహం వ్యక్తం చేశారు. శుక్రవారం పార్వతీపురం మన్యం జిల్లా మక్కువ మండలం యర్రసామంతవలస సబ్‌స్టేషన్‌ పరిధిలోని 30 గ్రామాలకు చెందిన వంద మంది రైతులు ఏఈ కార్యాలయం వద్ద ఆందోళన చేపట్టారు. ప్రస్తుతం నాలుగు గంటలు కూడా సక్రమంగా విద్యుత్తు ఇవ్వడం లేదని మండిపడ్డారు. మొక్కజొన్న, ఆయిల్‌పాం, ఇతర పంటలు ఎండిపోయే పరిస్థితి నెలకొందన్నారు. నిరంతరం లైన్లు ట్రిప్‌ అవుతుండటంతో వ్యవసాయ బోర్లు కాలిపోతున్నాయని, మరమ్మతులకు రూ.వేలల్లో ఖర్చవుతుందని ఆవేదన వ్యక్తం చేస్తూ అక్కడే బైఠాయించారు. విద్యుత్తు వినియోగం పెరగడంతో కొన్ని గంటలు తగ్గించాల్సి వస్తుందని సబ్‌ ఇంజినీర్‌ శివశంకర్‌ తెలిపారు. సమస్యను ఉన్నతాధికారుల దృష్టికి తీసుకువెళ్లి పది రోజుల్లో పరిష్కరిస్తామని హామీ ఇవ్వడంతో రైతులు వెనుదిరిగారు.