టెట్‌, టీఆర్‌టీల షెడ్యూల్‌ మార్చాలన్న అభ్యర్థనకు తిరస్కరణ

ఈ దశలో మధ్యంతర ఉత్తర్వులివ్వలేమన్న హైకోర్టు
తుది విచారణ 28కి వాయిదా

ఈనాడు, అమరావతి: ఏపీ ఉపాధ్యాయ అర్హత పరీక్ష(టెట్‌), ఉపాధ్యాయ నియామక పరీక్ష(టీఆర్‌టీ-డీఎస్సీ)ల నిర్వహణ మధ్య సముచిత సమయం ఉండే విధంగా షెడ్యూల్‌ను నిర్ణయించేలా ప్రభుత్వాన్ని ఆదేశించాలంటూ పిటిషనర్లు చేసిన అభ్యర్థనను హైకోర్టు తోసిపుచ్చింది. ఈ దశలో ఎలాంటి మధ్యంతర ఉత్తర్వులూ ఇవ్వలేమని స్పష్టంచేసింది. పూర్తి వివరాలతో కౌంటర్‌ వేయాలని పాఠశాల విద్యాశాఖ ముఖ్యకార్యదర్శి, పాఠశాల విద్య కమిషనర్‌ను ఆదేశించింది. తుది విచారణ జరిపేందుకు కేసును ఈ నెల 28కి వాయిదా వేసింది. హైకోర్టు న్యాయమూర్తి జస్టిస్‌ గన్నమనేని రామకృష్ణప్రసాద్‌ శుక్రవారం ఈమేరకు ఉత్తర్వులు జారీచేశారు. టెట్‌ నిర్వహణ కోసం రాష్ట్రప్రభుత్వం ఈ నెల 8న ఇచ్చిన నోటిఫికేషన్‌, ఉపాధ్యాయ పోస్టుల భర్తీ కోసం ఈ నెల 12న ఇచ్చిన నోటిఫికేషన్ను సవాలు చేస్తూ శ్రీకాకుళం జిల్లాకు చెందిన ఎం పెద్దిరాజు మరో నలుగురు హైకోర్టులో వ్యాజ్యం వేశారు. నోటిఫికేషన్లను రద్దు చేయాలని కోరారు. పరీక్షలకు సిద్ధపడేందుకు సముచిత సమయం లేకుండా షెడ్యూల్‌ను ఖరారు చేశారన్నారు. బుధవారం ఈ వ్యాజ్యంపై వాదనలు ముగిశాయి. శుక్రవారం నిర్ణయాన్ని వెల్లడించిన న్యాయమూర్తి.. ఈ దశలో ఎలాంటి మధ్యంతర ఉత్తర్వులివ్వలేమని స్పష్టంచేశారు.