తితిదే నిబంధనలు వైకాపా నేతలకు వర్తించవా?

తిరుమల, న్యూస్‌టుడే: తిరుమల కొండపైకి ప్లాస్టిక్‌ వాటర్‌ బాటిల్స్‌ను తితిదే నిషేధించిన విషయం అందరికీ తెలిసిందే. వైకాపా నాయకులు మాత్రం ఇవేవీ పట్టించుకోవడం లేదు. శనివారం తిరుమలకు ప్లాస్టిక్‌ వాటర్‌ బాటిల్స్‌ తీసుకొచ్చారు. ఈ సీసాలపై ‘సిద్ధం’ స్టిక్కర్లు ఉన్నాయి. వాటిపై ‘జి.శివారెడ్డి, మైదుకూరు నియోజకవర్గం’ అని వైకాపా నాయకులు, సీఎం జగన్‌ చిత్రాలు ముద్రించారు.

శ్రీవారి ఆలయం సమీపంలో నిలిపిన రాష్ట్ర ప్రభుత్వ వ్యవసాయశాఖ ప్రధాన సలహాదారు వాహనంలో ఈ సీసాలు కనిపించాయి. సాధారణంగా అలిపిరి తనిఖీ కేంద్రంలో వీటిని గుర్తించి తొలగించాలి. తనిఖీల నుంచి వీఐపీలకు మినహాయింపు ఉండటంతో.. దాన్ని అలుసుగా తీసుకొని వైకాపా నాయకులు ప్రచారం కోసం నిబంధనలు తుంగలో తొక్కుతున్నారు.