Prakasam: తన పేరు లేదని శిలాఫలకాలు ధ్వంసం చేసిన వైకాపా సర్పంచి

పెద్దారవీడు, న్యూస్‌టుడే: ప్రకాశం జిల్లా పెద్దారవీడు మండలంలో అభివృద్ధి పనులకు ఉద్దేశించిన శిలాఫలకాలను వైకాపా సర్పంచి ధ్వంసం చేశారు. ఆ వీడియో సామాజిక మాధ్యమంలో వైరల్‌ అయింది. మండలంలోని రేగునుమానుపల్లి, చట్లమిట్ల గ్రామాల సచివాలయం, ఆర్బీకేలు రేగునుమానుపల్లిలో నిర్మించారు. అక్కడే ఏర్పాటు చేసిన శిలాఫలకాలపై రేగునుమానుపల్లి సర్పంచి పాలగిరి వెంకట రామాంజనేయరెడ్డి పేరును మాత్రం చేర్చలేదు.

వైకాపాకు చెందిన ఓ వర్గం నాయకుల ఒత్తిళ్లకు తలొగ్గి అధికారులు కావాలనే తన పేరును రాయలేదని రామాంజనేయరెడ్డి ఆగ్రహం వ్యక్తం చేశారు. నాయకులు, అధికారుల పేర్లు రాసి.. సర్పంచుల సంఘం మండల అధ్యక్షుడిగా ఉన్న తన పేరును విస్మరించారని మంగళవారం సుత్తెతో ఆ శిలాఫలకాలను ధ్వంసం చేశారు. తనను గౌరవించకపోవడంతో బాధించి ఇలా చేశానని ఆయన చెప్పుకొచ్చారు.