45 రోజుల తర్వాత మీరూ ప్రభుత్వ ఉద్యోగులే

‘వాలంటీర్లకు వందనం’ సభలో వైకాపా ప్రజాప్రతినిధుల హామీల వరద

గుంటూరు (గోరంట్ల), న్యూస్‌టుడే: ‘నాలుగేళ్లుగా మీ సేవలు అమూల్యం. మరో 45 రోజులు కష్టపడి పనిచేసి మళ్లీ జగన్‌ను సీఎం చేయాలి. అప్పుడు మీరూ ప్రభుత్వ ఉద్యోగులుగా మారతారు..’ వాలంటీర్లకు వందనం పేరుతో నిర్వహిస్తున్న సభల్లో వైకాపా ప్రజాప్రతినిధుల హామీల వరద ఇది. మంత్రి విడదల రజిని పాల్గొన్న గుంటూరు పశ్చిమ నియోజకవర్గం వాలంటీర్ల సభలో నగర మేయర్‌ మనోహర్‌నాయుడు, డిప్యూటీ మేయర్‌ బాలవజ్రబాబు ఇలా వాగ్దానాలను కురిపించారు. గుంటూరు వైద్య కళాశాలలోని జింకానా ఆడిటోరియంలో బుధవారం నిర్వహించిన సభలో గుంటూరు పశ్చిమ నియోజకవర్గ పరిధి వాలంటీర్లకు పురస్కారాలను అందజేశారు. ఈ పరిధిలో మొత్తం 1,597 మంది వాలంటీర్లుండగా.. అయిదుగురికి సేవావజ్ర, 18 మందికి సేవారత్న, 1,574 మంది సేవామిత్ర పురస్కారాలిచ్చారు. ఎన్నికలు సమీపిస్తున్న సమయంలో అందరికీ పురస్కారాలిచ్చారనే చర్చ సమావేశంలో సాగింది. మంత్రి ప్రసంగిస్తుండగా కొందరు వాలంటీర్లు బయటకు వెళ్లిపోయారు. సభలో వైకాపా ప్రచార పాటలు వినిపించారు. సభ ప్రభుత్వం నిర్వహిస్తున్నా వేదికలపై పార్టీ నేతలు ఆసీనులవడం విమర్శలకు తావిచ్చింది. గుంటూరు తూర్పు నియోజకవర్గంలో జరిగిన సభలోనూ పార్టీ నాయకులు పాల్గొన్నారు.