‘ఎన్నికలప్పుడు మా గ్రామాలకు ఎలా వస్తారో చూస్తాం’

ఉప ముఖ్యమంత్రి రాజన్నదొర తీరుపై గిరిజనుల ఆగ్రహం
వినతిపత్రం తీసుకోకుండా వెళ్లిపోవడంపై అభ్యంతరం

గజపతినగరం(మెంటాడ), న్యూస్‌టుడే: ‘భూ సమస్యలు పరిష్కరించాలని, సాగుభూమి పట్టాలివ్వాలంటూ వినతి ఇచ్చేందుకు వచ్చిన మమ్మల్ని విస్మరించారు. ఎన్నికల సమయంలో మా గ్రామాలకు ఎలా వస్తారో చూస్తాం’ అంటూ విజయనగరం జిల్లా మెంటాడ మండలానికి చెందిన పలువురు గిరిజనులు ఉప ముఖ్యమంత్రి రాజన్నదొరపై ఆగ్రహం వ్యక్తం చేశారు. మెంటాడ ఎంపీడీవో కార్యాలయంలో బుధవారం నిర్వహించిన వాలంటీర్లకు వందనం, ఇళ్ల పట్టాల పంపిణీ కార్యక్రమాల్లో పాల్గొనేందుకు రాజన్నదొర వస్తారని తెలుసుకున్న ఆండ్ర, కె.లింగాలవలస తదితర గ్రామాలకు చెందిన గిరిజనులు అక్కడికి చేరుకున్నారు. రెండు గంటల నిరీక్షణ తరువాత అక్కడికి వచ్చిన రాజన్నదొరకు.. సాగుభూమికి పట్టాలు ఇవ్వాలని కోరుతూ వినతి ఇచ్చినా తీసుకోకుండా వెళ్లిపోయారు. దీంతో సీపీఎం నాయకుడు రాకోటి రాములు, గిరిజన సంఘ నేత తామరాపల్లి సోములుల ఆధ్వర్యంలో వారంతా రాజన్నదొర తీరుపై తీవ్ర అభ్యంతరం వ్యక్తం చేశారు. ప్రజాప్రతినిధికి ప్రజల సమస్యలను వినాల్సిన బాధ్యత ఉన్నా, విస్మరించడం సరికాదని మండిపడ్డారు.