Kurnool: గ్రూప్‌-2లో నిబంధనల ఉల్లంఘన

ఈనాడు, కర్నూలు: రాష్ట్ర ప్రభుత్వం ఈ నెల 25న ప్రతిష్ఠాత్మకంగా నిర్వహించిన గ్రూప్‌-2 పరీక్షలో కర్నూలు జిల్లా ఆదోనిలోని ఓ కేంద్రంలో నిబంధనల ఉల్లంఘన జరిగిన విషయం ఆలస్యంగా వెలుగులోకి వచ్చింది. ఆదోనిలోని భాష్యం విద్యాసంస్థలో గది నంబరు 6కు ఇన్విజిలేటర్‌గా బాధ్యతలు నిర్వర్తించిన ఓ వ్యక్తి ప్రశ్నపత్రాలను సీల్డ్‌ కవర్‌లో కాకుండా నేరుగా గదిలోకి తీసుకురావడంతో పరీక్ష రాసేందుకు వచ్చినవారు దీనిపై అభ్యంతరాలు తెలిపారు. ప్రశ్నపత్రాల కవర్లను ఇన్విజిలేటర్లకు ఇచ్చిన గదిలోనే తెరిచినట్లు ఆరోపణలు వచ్చాయి. ఓ ప్రశ్నపత్రానికి ఉండాల్సిన స్టిక్కర్‌ సీల్‌ కూడా లేదని అభ్యర్థులు గుర్తించారు. ఆ విషయం ప్రస్తావించగా సీల్‌ ఊడిపోయి ఉందని ఇన్విజిలేటర్‌ చెప్పినట్లు సమాచారం. పరీక్ష ముగిసిన తర్వాత ఆ గదిలో పరీక్ష రాసిన విద్యార్థులు విషయాన్ని అదేరోజు పరీక్ష కేంద్రంలో విధులు నిర్వర్తించిన ప్రభుత్వ అధికారులకు ఫిర్యాదు చేశారు.