Amaravati: రాజధాని పేదల విద్య, వైద్యం ఇప్పుడు గుర్తొచ్చాయా?

ఎన్నికల వేళ నిధులు విడుదల చేసిన ప్రభుత్వం

ఈనాడు, అమరావతి: ఎన్నికల వేళ రాజధాని పేదలపై జగన్‌ ప్రభుత్వానికి ఎక్కడలేని ప్రేమ పుట్టుకొచ్చేస్తోంది. అమరావతిని సర్వనాశనం చేసేందుకు అయిదేళ్లుగా కంకణం కట్టుకుని, అక్కడి ప్రజలపై ఎక్కడలేని దాష్టీకాలు చేసిన జగన్‌ ప్రభుత్వం.. ఎన్నికలు దగ్గరకొచ్చేసరికి రాజధాని గ్రామాల పేదల్ని మంచి చేసుకునేందుకు అనేక గిమ్మిక్కులు ప్రదర్శిస్తోంది. రాజధానిలోని భూమిలేని పేదలకు ప్రతి నెలా ఇచ్చే పింఛను రూ.2,500 నుంచి రూ.5 వేలకు పెంచుతున్నట్టు ప్రకటించిన ప్రభుత్వం.. ఆ నిధులు విడుదల చేస్తూ శుక్రవారం జీవో ఇచ్చింది. పేదలకు పింఛన్లతో పాటు ఉచిత విద్య, వైద్య వసతి కల్పించేందుకు రూ.21.98 కోట్లు విడుదల చేస్తూ పురపాలకశాఖ ప్రత్యేక ప్రధాన కార్యదర్శి వై.శ్రీలక్ష్మి శుక్రవారం ఉత్తర్వులు జారీ చేశారు.