ఆదివారం బడి పెట్టుకోండి.. సోమవారం సెలవు ఇచ్చుకోండి

నంద్యాల విద్య, న్యూస్‌టుడే: నంద్యాల జిల్లా బనగానపల్లెలో సోమవారం(ఈ నెల 4న) ముఖ్యమంత్రి జగన్‌ పర్యటన సందర్భంగా.. జిల్లాలోని విద్యాసంస్థలకు చెందిన బస్సులను అధికారులకు అప్పగించాలని డీఈవో సుధాకర్‌రెడ్డి ఆదేశాలిచ్చినట్లు తెలిసింది. సీఎం సభకు ప్రజలను తరలించడానికి వీలుగా ఈ నెల 3న సాయంత్రం 5 గంటల్లోగా బస్సులు అప్పగించాలన్నారు. అవసరమైతే ఆదివారం తరగతులు నిర్వహించుకోవచ్చని.. సోమవారం సెలవు ప్రకటించాలని ఆయా యాజమాన్యాలకు సూచించినట్లు తెలిసింది. పరీక్షల సమయంలో ఇలా పాఠశాలల బస్సులు తరలిస్తే విద్యార్థులు ఇబ్బందులు పడే అవకాశం ఉందని విమర్శలు వెల్లువెత్తుతున్నాయి.