నేడు పల్స్‌ పోలియో

ఈనాడు డిజిటల్‌, అమరావతి: ‘నేషనల్‌ ఇమ్యునైజేషన్‌ డే’ను పురస్కరించుకుని రాష్ట్రవ్యాప్తంగా ఉన్న అయిదేళ్లలోపు పిల్లలకు ఆదివారం పల్స్‌ పోలియో చుక్కలు వేసేందుకు ఏర్పాట్లు పూర్తిచేసినట్లు రాష్ట్ర వైద్యారోగ్యశాఖ తెలిపింది. ఆదివారం బూత్‌డే కాగా.. 4, 5 తేదీల్లో గ్రామీణ ప్రాంతాల్ల్లో, 6న పట్టణ ప్రాంతాల్లో వైద్యసిబ్బంది ఇంటింటికీ వెళ్లి పోలియో చుక్కలు వేస్తారని ఆరోగ్య కుటుంబ సంక్షేమశాఖ కమిషనర్‌ జె.నివాస్‌ తెలిపారు. రాష్ట్రంలోని 53,35,519 మంది అయిదేళ్లలోపు పిల్లలకు పోలియో చుక్కలు వేయడానికి 37,465 కేంద్రాలను ఏర్పాటు చేసినట్లు ఆయన శనివారం ఓ ప్రకటనలో తెలిపారు ‘నిండు జీవితానికి రెండు చుక్కలు’ నినాదం ద్వారా సిబ్బంది.. పోలియో చుక్కల ప్రయోజనాన్ని పిల్లల తల్లిదండ్రులకు తెలియజేసేలా చర్యలు తీసుకోవాలని డీఎంహెచ్‌ఓలను కమిషనర్‌ జె.నివాస్‌ ఆదేశించారు.