వివేకా కేసులో జగన్‌ పాత్రపై విచారణ జరిపించాలి

పెద్దాపురం ఎమ్మెల్యే నిమ్మకాయల చినరాజప్ప

పెద్దాపురం, న్యూస్‌టుడే: వైఎస్‌ వివేకా హత్య కేసులో సీఎం జగన్‌ పాత్రపై విచారణ జరిపించాలని పెద్దాపురం తెదేపా ఎమ్మెల్యే నిమ్మకాయల చినరాజప్ప డిమాండు చేశారు. కాకినాడ జిల్లా పెద్దాపురంలో శనివారం ఆయన విలేకర్లతో మాట్లాడారు. ‘రాజకీయ లబ్ధి కోసం వివేకానందరెడ్డిని కిరాతకంగా హత్య చేశారు. గొడ్డలివేటుతోనే బాబాయ్‌ చనిపోయారని సీఎం అంత కచ్చితంగా ఎలా చెప్పగలిగారు? సీబీఐ విచారణకు పిటిషన్‌ వేస్తానని సునీత అంటే జగన్‌ ఎందుకు ఆపారు? హత్య కేసులో సీబీఐ విచారణ కోరిన ఆయన.. తర్వాత వద్దనడం వెనుక బలమైన కారణం ఉంది. అదేంటో ప్రజలకు చెప్పాల్సిందే. వివేకా ఎలా చనిపోయారో సీఎంకు తెలుసు, దానిని ఎందుకు దాచాలనుకుంటున్నారు? తండ్రిని హత్య చేసిన కేసులో తనకు న్యాయం చేయాలని సునీత పోరాడుతుంటే.. తమ్ముడిని సీబీఐ అరెస్టు చేయకుండా జగన్‌ అడ్డుకుంటున్నారు’ అని చినరాజప్ప విమర్శించారు. ఆమె పోరాటానికి తెదేపా అండగా నిలుస్తుందన్నారు. కుట్రలు, కుతంత్రాలు చేసే పార్టీని కాకుండా అభివృద్ధి, సంక్షేమాన్నిచ్చే తెదేపా-జనసేన కూటమిని గెలిపించాలని కోరారు.