Kakinada: వైకాపా అభ్యర్థికి.. అధికారం దాసోహం!

ఈనాడు, కాకినాడ: ఆయనకు ప్రభుత్వపరంగా ఏ హోదా లేదు. కానీ ఆయన పుట్టినరోజు వేడకల్లో కీలక శాఖలు అడుగడుగునా సహకరించి స్వామిభక్తి చాటుకున్నాయి. కాకినాడ వైకాపా ఎంపీ అభ్యర్థి చలమలశెట్టి సునీల్‌ పుట్టినరోజు వేడుకలు సోమవారం భారీగా నిర్వహించారు. 20వేల మందికి మాంసాహార భోజనాలు పెట్టారు. జేఎన్‌టీయూకే ఎదురుగా వేదిక ఏర్పాటుచేసి హోర్డింగులతో హంగామా చేయడంతో జనాల రాకపోకలకు అసౌకర్యం కలిగింది. ట్రాఫిక్‌ చక్కదిద్దడానికి.. ప్రైవేటు కార్యక్రమానికి బందోబస్తుగా 50 మందికి పైగా పోలీసులు సేవలు అందించారు. జేఎన్‌టీయూ ప్రాంగణంలో వాహనాల పార్కింగ్‌ ఏర్పాటుచేయడంతో మైకుల హోరు, రణగొణ ధ్వనులతో విద్యార్థులు అసౌకర్యానికి గురయ్యారు. పార్కింగ్‌కు జేఎన్‌టీయూ యాజమాన్యం అనుమతివ్వడం విమర్శలకు తావిచ్చింది. ట్రాఫిక్‌ సమస్య నేపథ్యంలో డీఎస్పీ కోరడంతో సరే అన్నామని జేఎన్‌టీయూ వీసీ ప్రసాదరాజు తెలిపారు.