పంటలు ఎండిపోతున్నా పట్టించుకోరేం?

ఎమ్మెల్యే మేకపాటి విక్రమ్‌రెడ్డిని  ప్రశ్నించిన మహిళ

సంగం, న్యూస్‌టుడే: ‘నోటి కాడికి వచ్చిన పంట నిలువునా ఎండిపోతుంటే పట్టించుకోరా’ అని శ్రీపొట్టి శ్రీరాములు నెల్లూరు జిల్లా సంగం మండలం దువ్వూరుకు చెందిన రమణమ్మ.. ఆత్మకూరు ఎమ్మెల్యే మేకపాటి విక్రమ్‌రెడ్డిని బుధవారం ప్రశ్నించారు. దువ్వూరులో బుధవారం ఆయన ప్రచారం చేస్తుండగా గ్రామస్థులు తమ సమస్యలను చెప్పుకున్నారు. ఈ క్రమంలో ఎస్సీ కాలనీలో పర్యటిస్తున్న ఎమ్మెల్యేకు ఎదురుగా వెళ్లిన రమణమ్మ.. కనిగిరి జలాశయం వెనక ప్రాంతంలో వందలాది ఎకరాల్లో వరి పంట ఎండిపోతున్నా పట్టించుకోరేమని అడ్డుకున్నారు. అడ్డుతప్పుకోవాలంటూ వైకాపా నాయకులు ఆమెను సముదాయించారు. సమస్య పరిష్కరిస్తానని ఎమ్మెల్యే హామీ ఇచ్చి ముందుకు కదిలారు. ఇదే కాలనీలో మరోచోట ఇద్దరు వ్యక్తులు ఎమ్మెల్యేపై ప్రశ్నల వర్షం కురిపించారు. రహదారులన్నీ గుంతలమయంగా మారినా పట్టించుకునే వారేలేరనీ వాపోయారు.