వాలంటీర్లతో వైకాపా నాయకుడి రహస్య మంతనాలు

విశాఖపట్నంలో ఘటన

విశాఖపట్నం (ఎం.వి.పి.కాలనీ, మద్దిలపాలెం), న్యూస్‌టుడే: ఎన్నికల కోడ్‌ అమల్లో ఉండగా వాలంటీర్లతో విశాఖ తూర్పు వైకాపా నాయకుడు ఒకరు రహస్య సమావేశం ఏర్పాటు చేయడం చర్చనీయాంశమైంది. సీతమ్మధారలో ఆ నాయకుడికి చెందిన కల్యాణ మండపంలోనే గురువారం సాయంత్రం ఈ సమావేశం ఏర్పాటు చేశారు. తనకు అత్యంత సన్నిహితంగా ఉండే 16వ వార్డుకు చెందిన సుమారు 16 మంది వాలంటీర్లు ఈ సమావేశానికి హాజరయ్యారు. వారిని సదరు నాయకుడు సామూహిక రాజీనామాలు చేయాల్సిందిగా ఆదేశించారు. రాజీనామా చేసి నేరుగా ఎన్నికల ప్రచారంలో పాల్గొనాలని, తిరిగి అధికారంలోకి వచ్చాక అందరినీ విధుల్లోకి తీసుకుంటామని ఆయన హామీ ఇచ్చారు. ఈ ప్రతిపాదనకు వాలంటీర్లు ఒప్పుకొన్నట్లు తెలుస్తోంది. సమావేశంపై కొందరు సీ-విజిల్‌కు సమాచారం అందించేలోపు అందరూ అక్కడి నుంచి జారుకున్నారు.