వైకాపాకు ప్రచారానికే సలహాదారు ఎత్తుగడ

సన్మానం పేరుతో ఉద్యోగులతో సమావేశాలకు యత్నాలు
ఆంధ్ర పెన్షనర్స్‌ పార్టీ అధ్యక్షుడు సుబ్బరాయన్‌ విమర్శ

ఈనాడు, అమరావతి:  ఏపీ ఎన్జీఓ సంఘం మాజీ అధ్యక్షుడు, ప్రభుత్వ సలహాదారు చంద్రశేఖరరెడ్డి ఉద్యోగులకు మేలు చేయకపోగా.. వారి జీవితాలను నాశనం చేస్తున్నారని ఆంధ్ర పెన్షనర్స్‌ పార్టీ అధ్యక్షుడు పాలంకి సుబ్బరాయన్‌ ఓ ప్రకటనలో విమర్శించారు. ‘‘వైకాపాకు కొమ్ము కాస్తూ ‘చలో విజయవాడ’ ఉద్యమాన్ని నీరుగార్చి, వ్యతిరేక ఫలితాలు రావడానికి ఆయన కారకుడయ్యారు. ప్రభుత్వ సలహాదారు హోదాలో ఉన్న చంద్రశేఖరరెడ్డి నిత్యం ఏపీ ఎన్జీఓ హోమ్‌కు వచ్చి కూర్చోవడం, సంఘ కార్యకలాపాల్లో కలగజేసుకోవడం తీవ్ర అభ్యంతరకరం. నూతనంగా ఎన్నికైన ఎన్జీఓ సంఘం అధ్యక్ష, ప్రధాన కార్యదర్శులు శివారెడ్డి, పుషోత్తమ నాయుడులకు సన్మానం పేరుతో వైకాపాకు అనుకూలంగా ప్రచారం చేసేందుకు జిల్లాల్లో సమావేశాలు నిర్వహించడానికి చంద్రశేఖరరెడ్డి ప్రయత్నిస్తున్నారు. దీనిపై ఇప్పటికే ఎన్నికల సంఘానికి ఫిర్యాదు చేశాం. ఉద్యోగులు, ఉపాధ్యాయులు, కార్మికులు, పెన్షనర్లు ఒకటో తేదీన జీతాలు, పెన్షన్లు రాక ఇబ్బందులు పడుతున్నారు. తమకు రావాల్సిన బకాయిల సొమ్ము చేతికి అందకుండానే ఎందరో పెన్షనర్లు చనిపోయారు. ఈ పాపం జగన్‌కు తప్పనిసరిగా తగులుతుంది. నిరసన తెలిపే హక్కును వైకాపా ప్రభుత్వం కాల రాసింది’’ అని విమర్శించారు.