రాష్ట్రంలోనే తొలిసారి బ్రెయిలీ లిపిలో ఫిర్యాదు

విశాఖపట్నం (మద్దిలపాలెం), న్యూస్‌టుడే: రాష్ట్రంలోనే తొలిసారిగా బ్రెయిలీ లిపిలో ఇచ్చిన ఫిర్యాదును స్వీకరించిన విశాఖ పోలీసులు ఎఫ్‌ఐఆర్‌ నమోదు చేశారు. ఆ వివరాలిలా.. విశాఖపట్నం బిర్లా జంక్షన్‌, బొత్స స్క్వేర్‌ వద్ద ఉన్న ఓ కంపెనీ వారు అధిక లాభాల పేరిట అనకాపల్లి జిల్లా కోటవురట్ల మండలం జల్లూరుకు చెందిన ఓ అంధుడి నుంచి రూ.2.90 లక్షలు, కాకినాడకు చెందిన అతని స్నేహితుడి వద్ద నుంచి రూ.11 లక్షలను వసూలు చేసి ఆ మొత్తాన్ని కాజేశారు. దీంతో ఇటీవల అంధుడు దిశ దివ్యాంగ సురక్ష (డీడీఎస్‌) ద్వారా ఫిర్యాదు చేశారు. బ్రెయిలీ లిపిలో ఉన్న ఫిర్యాదును నగర పోలీస్‌ కమిషనర్‌ రవిశంకర్‌ స్వీకరించారు. వెంటనే ఎఫ్‌ఐఆర్‌ నమోదు చేసి విచారణ చేపట్టారు.