ఇంటి వద్దనే పింఛను అందించాలి

లబ్ధిదారులకు నగదు రూపంలోనే చెల్లించండి
ప్రభుత్వాన్ని ఆదేశించాలని కోరుతూ సీఈఓకు చంద్రబాబు లేఖ

ఈనాడు డిజిటల్‌, అమరావతి: వాలంటీర్ల ద్వారా పింఛన్ల పంపిణీని నిలిపివేస్తూ కేంద్ర ఎన్నికల సంఘం ఆదేశాలిచ్చినందున వెంటనే ప్రత్యామ్నాయ ఏర్పాట్లు చేయాలని, లబ్ధిదారుల ఇళ్ల వద్దకే వెళ్లి పింఛను ఇవ్వాలని తెదేపా అధినేత చంద్రబాబు కోరారు. ఎలాంటి జాప్యానికీ తావులేకుండా నగదు రూపంలోనే పింఛను చెల్లించేలా రాష్ట్ర ప్రభుత్వాన్ని ఆదేశించాలని కోరుతూ రాష్ట్ర ప్రధాన ఎన్నికల అధికారి (సీఈఓ) ముకేశ్‌కుమార్‌ మీనాకు ఆదివారం ఆయన లేఖ రాశారు.

‘‘గ్రామ, వార్డు సచివాలయ సిబ్బందిని పింఛను పంపిణీలో వినియోగించాలి. ఈ మేరకు పింఛను నగదును బ్యాంకుల నుంచి గ్రామాలకు తీసుకువెళ్లేందుకు సచివాలయ సిబ్బందికి అనుమతి ఇవ్వాలని ఎంపీడీవోలు, మున్సిపల్‌ కమిషనర్లకు గ్రామీణ పేదరిక నిర్మూలన సంస్థ (సెర్ప్‌) సీఈవో ఇప్పటికే ఆదేశాలిచ్చారు. అయితే ఇప్పటివరకు పింఛన్ల పంపిణీకి కావాల్సిన మొత్తాన్ని సంబంధిత శాఖ వద్ద ఉంచలేదనే వార్తలు వస్తున్నాయి. కావున వెంటనే నిధులు సమకూర్చండి. గతంలో మాదిరిగానే ఒకటో తేదీ నుంచి అయిదో తేదీ మధ్య పింఛన్ల పంపిణీ ప్రక్రియ పూర్తి చేయడానికి అవసరమైన యంత్రాంగాన్ని, నిధుల్ని సమకూర్చడం, అందుకు కావాల్సిన పాలనాపరమైన చర్యలు తీసుకునేలా రాష్ట్ర ప్రభుత్వాన్ని ఆదేశించండి’’ అని చంద్రబాబు లేఖలో కోరారు. ఇదే అంశంపై సీఎస్‌ జవహర్‌రెడ్డికి చంద్రబాబు మరో లేఖ రాశారు.