పంచాంగ శ్రవణం లేదు.. వేదపండితుల ఆశీర్వచనమే..

ఉగాది రోజున విశ్రాంతిలో సీఎం జగన్‌
నేతలెవరూ రావొద్దని ముందే ఆదేశాలు

ఈనాడు డిజిటల్‌-నరసరావుపేట, శావల్యాపురం-న్యూస్‌టుడే: సీఎం జగన్‌ ఉగాది రోజున విశ్రాంతికే పరిమితమయ్యారు. జ్వరంతో బాధపడుతున్నారని, అందుకే వేడుకలు నిర్వహించలేదని తెలుస్తోంది. పల్నాడు జిల్లాలో ఉగాది వేడుకలు ఉంటాయని, పంచాంగ శ్రవణం కూడా ఉంటుందని మొదట పార్టీవర్గాలు తెలిపాయి. పంచాంగ శ్రవణం ఉంటుందని కార్యకర్తలు భారీఎత్తున రాగా, లేకపోవడంతో వారంతా నిరాశతో వెనుదిరిగారు. సోమవారం రాత్రి వినుకొండ నుంచి రోడ్‌షోగా వచ్చిన జగన్‌ రాత్రి శావల్యాపురం మండలం గంటావారిపాలెం విడిది కేంద్రంలో బస చేశారు. మరుసటి రోజు మంగళవారం ఉగాది కావడంతో వేడుకలు ఏమైనా ఉంటాయేమోనని పార్టీ నేతలు కొందరు రాగా వారిని భద్రతా సిబ్బంది పంపించేశారు. అయితే ఉదయం స్థానిక ఎమ్మెల్యే బొల్లా బ్రహ్మనాయుడు, నరసరావుపేట లోక్‌సభ అభ్యర్థి అనిల్‌కుమార్‌యాదవ్‌, ఎమ్మెల్సీలు లేళ్ల అప్పిరెడ్డి, తలశిల రఘురామ్‌లు విడిది కేంద్రంలోకి వెళ్లారు. వేదపండితులు ప్రత్యేక పూజలు నిర్వహించి సీఎం దంపతులకు వేద ఆశీర్వచనాలు అందజేశారు. ఆ తరవాత వారికి ఉగాది పచ్చడి ఇచ్చారు. అరగంటలో పూజా కార్యక్రమం ముగిసింది.