బోధనేతర ఉద్యోగుల సంఘం అధ్యక్షుడిపై ఈసీ కొరడా

ఏఎన్‌యూ, న్యూస్‌టుడే: రాష్ట్ర విశ్వవిద్యాలయాల బోధనేతర ఉద్యోగుల సంఘం అధ్యక్షుడు, ఆచార్య నాగార్జున విశ్వవిద్యాలయ ఉద్యోగి వెంకటప్పారెడ్డిపై ఎన్నికల సంఘం కొరడా ఝుళిపించింది. సామాజిక మాధ్యమాల్లో ప్రభుత్వానికి అనుకూలంగా పోస్టులు పెట్టడంతో తెదేపా జిల్లా నాయకులు ఇటీవల ఈసీ అధికారులకు ఫిర్యాదు చేశారు. దీనిపై స్పందించిన ఈసీ.. వెంకటప్పారెడ్డికి షోకాజు నోటీసు జారీచేసింది. ఆయన వివరణఇస్తూ.. తన ఫోన్‌ హ్యాకింగ్‌కు గురైందని, ఎవరో పోస్టులు పెట్టారంటూ సమాధానం ఇచ్చారు. ఈ విషయమై పోలీసులకు ఎందుకు ఫిర్యాదు చేయలేదని ఈసీ ప్రశ్నించింది. సమాధానం చెప్పకపోవడంతో ఆయన్ని విధుల నుంచి తొలగించాలని ఏఎన్‌యూకి సమాచారం ఇచ్చింది. ఈసీ ఆదేశాలతో వెంకటప్పారెడ్డిని విధుల నుంచి తప్పించారు.