ఆర్టీసీ డిపోల్లో ఎన్నికల ప్రచారం చేసిన మరో అయిదుగురిపై వేటు

ఈనాడు, అమరావతి: వైకాపాకి ఓటేయాలని ఆర్టీసీ డిపోలు, గ్యారేజీల్లో ప్రచారం చేసిన పీటీడీ వైఎస్‌ఆర్‌ ఉద్యోగుల సంఘం నేతల్లో మరో అయిదుగురిని ఆర్టీసీ అధికారులు సస్పెండ్‌ చేసినట్లు తెలిసింది. ఏపీ ప్రభుత్వ ఉద్యోగుల ఫెడరేషన్‌ ఛైర్మన్‌ వెంకట్రామిరెడ్డితోపాటు, పీటీడీ వైఎస్‌ఆర్‌ ఉద్యోగుల సంఘం అధ్యక్షులు చల్లా చంద్రయ్యతో కలిపి ఆసంఘానికి చెందిన నేతలు గతనెల 31న కడప, బద్వేలు, మైదుకూరు, ప్రొద్దుటూరు డిపోల్లో వైకాపాకి అనుకూలంగా ప్రచారం చేశారు. తొలుత ఆ సంఘం రాష్ట్ర అధ్యక్షునితోపాటు, వైయస్‌ఆర్‌ జిల్లాకు చెందిన ముగ్గురు యూనియన్‌ నేతలను సస్పెండ్‌చేశారు. తాజాగా తిరుపతి, బనగానపల్లి, ఒంగోలు డిపోల నుంచి వచ్చి ప్రచారంలో పాల్గొన్న మరో అయిదుగురు యూనియన్‌ నేతల్ని సస్పెండ్‌ చేసినట్లు తెలిసింది.