వలలో చిక్కిన భారీ తిమింగలం

అచ్యుతాపురం, న్యూస్‌టుడే: అనకాపల్లి జిల్లా అచ్యుతాపురం మండలం తంతడి-వాడపాలెంలో మత్స్యకారుల వలకు శుక్రవారం భారీ తిమింగలం చిక్కింది. పరవాడ మండలం వాడచీపురపల్లికి చెందిన మత్స్యకారులు తీరంలో చేపల వల లాగుతుండగా చాలా బరువు అనిపించింది. పెద్దఎత్తున చేపలు పడ్డాయనుకొని వలను అతి కష్టం మీద తీరానికి లాక్కొని రాగా.. అందులో తిమింగలం కనిపించింది. 30 అడుగుల పొడవు, 6 అడుగుల వెడల్పు ఉండటంతో తొలుత మత్స్యకారులు ఆందోళన చెందారు. కొందరు ధైర్యం చేసి దాన్ని పరిశీలించి అనారోగ్యంతో ఉన్నట్లు గుర్తించారు. తిరిగి సముద్రంలోకి పంపేందుకు యత్నించినా ఫలితం లేకపోయింది. దీంతో అక్కడే వదిలేశారు. తిమింగలం అక్కడే చనిపోతే రోజుల తరబడి దుర్గంధం భరించలేమని, వెంటనే తొలగించడానికి అధికారులు చర్యలు తీసుకోవాలని మత్స్యకారులు అధికారులను కోరారు. పరవాడ, అచ్యుతాపురం సెజ్‌లకు చెందిన కొన్ని పరిశ్రమలు రసాయన వ్యర్థాలను శుద్ధి చేయకుండా సముద్రంలోకి వదిలేస్తుండటం వల్ల గతంలోనూ చిన్నచిన్న తిమింగలాలు చనిపోయి తీరానికి చేరాయని తెలిపారు.