శ్రీవారి సేవలో సుప్రీంకోర్టు న్యాయమూర్తులు

తిరుమల, న్యూస్‌టుడే: శ్రీవారి అభిషేక సేవలో సుప్రీంకోర్టు న్యాయమూర్తులు జస్టిస్‌ సంజయ్‌ కరోల్‌, జస్టిస్‌ సీటీ రవికుమార్‌ శుక్రవారం పాల్గొన్నారు. తెల్లవారుజామున శ్రీవారి ఆలయానికి చేరుకున్న వీరికి ఆలయ అధికారులు సంప్రదాయబద్ధంగా స్వాగతం పలికారు. అభిషేక సేవలో పాల్గొన్న అనంతరం రంగనాయకుల మండపంలో వేదపండితులు ఆశీర్వచనం, తితిదే అధికారులు తీర్థప్రసాదాలు అందజేశారు.

వీరితోపాటు జిల్లా ప్రొటోకాల్‌ న్యాయమూర్తి ఎం.గురునాథ్‌, ప్రొటోకాల్‌ మున్సిఫ్‌ న్యాయమూర్తి పి.కోటేశ్వరరావు, పీఆర్వో ధనంజయనాయుడు ఉన్నారు. అనంతరం న్యాయమూర్తులు ఇద్దరూ వేర్వేరుగా శ్రీకాళహస్తీశ్వరుని సేవలో పాల్గొన్నారు.

శ్రీవారిని దర్శించుకున్న సీఈవో ముకేశ్‌కుమార్‌ మీనా

శ్రీవారి అభిషేక సేవలో రాష్ట్ర ప్రధాన ఎన్నికల అధికారి(సీఈవో) ముకేశ్‌కుమార్‌ మీనా దంపతులు పాల్గొన్నారు. శుక్రవారం తెల్లవారుజామున స్వామివారి సేవలో పాల్గొని మొక్కులు చెల్లించుకున్నారు. అనంతరం రంగనాయకుల మండపంలో వేదపండితులు ఆశీర్వచనం, తితిదే అధికారులు తీర్థప్రసాదాలు అందజేశారు. వీరితోపాటు తితిదే ఈవో ఏవీ ధర్మారెడ్డి, అధికారులు ఉన్నారు.