సీఎం వస్తున్నారంటే చెట్లపై గొడ్డలి వేటే!

ఈనాడు, ఏలూరు: సీఎం జగన్‌ ఎక్కడికయినా పర్యటనకు వస్తున్నారంటే ఆ మార్గంలో పచ్చని చెట్లకు గొడ్డలి వేటు తప్పడం లేదు. ‘మేమంతా సిద్ధం’ బస్సుయాత్రలో భాగంగా ఆయన పశ్చిమగోదావరి జిల్లా భీమవరం రానున్నారు. సభ అనంతరం ఉండి, పాములపర్రు, గణపవరం, నారాయణపురం మీదుగా దూబచర్ల వెళతారు. ఈ నేపథ్యంలో ఉండి - కోలమూరు మధ్య ఉన్న భారీ వృక్షాలను అడ్డగోలుగా నరికేస్తున్నారు. అధికారులు దగ్గరుండి ఈ పని చేయిస్తున్నారు. సీఎం వస్తే ఏమిటని.. ఎన్నో ఏళ్ల నుంచి నీడనిస్తున్న చెట్లను ఎలా నరికేస్తారని ఆయా గ్రామాల ప్రజలు మండిపడుతున్నారు. మరోవైపు అత్యంత అధ్వానంగా ఉండే నారాయణపురం - ఉండి రహదారికి అధికారులు ఇప్పటి వరకు కనీస మరమ్మతులు చేపట్టలేదు. సీఎం ఆ మార్గంలో వస్తున్నారనగానే హడావుడిగా గుంతలు పూడ్చే పనులు ప్రారంభించారు.