కుంటనీరే పంటకు ఆధారం!

గుండ్లకమ్మ ఆయకట్టు పరిస్థితి

ఈనాడు, ఒంగోలు: ప్రకాశం జిల్లాలోని గుండ్లకమ్మ ప్రాజెక్టు 2 గేట్లు ఏడాదిన్నర కిందట కొట్టుకుపోవడంతో జలాశయం దాదాపు ఖాళీ అయింది. నిల్వ ఉంటున్న కొద్దిపాటి నీటిని కాలువలకు ఇస్తున్నా.. అవి పంటలను కాపాడలేకపోతున్నాయి. దీంతో పదేళ్ల కిందట కరవు సంభవించినప్పుడు తవ్వుకున్న కుంటలే ఇప్పుడు రైతులకు దిక్కయ్యాయి. నాగులుప్పలపాడు మండలంలోని కండ్లకుంట గ్రామంలో గతంలో 20 మంది రైతులు కలిసి తవ్వుకున్న కుంటల్లోని నీటిని మోటార్లు పెట్టి పొలాలకు పారిస్తున్నారు. ‘పదేళ్లలో ఏనాడూ కుంట నీటిని వాడలేదు. ప్రాజెక్టు నీరు రాకపోవడంతో ఇప్పుడు అవే ఆధారమయ్యాయి. కుంటలు లేనివాళ్లు జలాశయం లోపల మోటార్లు పెట్టుకుంటున్నారు’ అని రైతులు ఆవేదన చెందారు.