సీఐడీ పిటిషన్‌పై విచారణ 30కి వాయిదా

ఈనాడు, అమరావతి: సీఆర్‌పీసీ సెక్షన్‌ 41ఏ నిబంధనలను ఉల్లంఘిస్తూ దర్యాప్తు అధికారులను బెదిరించేలా వ్యాఖ్యలు చేశారనే ఆరోపణతో తెదేపా ప్రధాన కార్యదర్శి లోకేశ్‌ అరెస్టుకు ఉత్తర్వులివ్వాలని అభ్యర్థిస్తూ.. విజయవాడ ఏసీబీ కోర్టులో సీఐడీ వేసిన పిటిషన్‌పై విచారణ ఈనెల 30కి వాయిదా పడింది. పత్రికా సమావేశంలో లోకేశ్‌ మాట్లాడిన అంశాలకు సంబంధించి ఏబీఎన్‌-ఆంధ్రజ్యోతి గతేడాది డిసెంబర్‌ 29న ప్రసారం చేసిన విషయాలతో సీఐడీ ఇటీవల మెమో దాఖలు చేసింది. సోమవారం జరిగిన విచారణలో లోకేశ్‌ తరఫు న్యాయవాది గూడపాటి లక్ష్మీనారాయణ ఈ మెమోపై అభ్యంతరం తెలిపారు. సీఐడీ ముందుగా వేసిన పిటిషన్లో ఈవిషయాన్ని ప్రస్తావించలేదన్నారు. వారి మెమోపై కౌంటర్‌ వేసేందుకు సమయం కావాలని కోరడంతో విచారణ వాయిదా పడింది.