జగన్‌ సభలో జనాలేరి?.. తంటాలు పడి తరలించినా వెళ్లిపోయారు

ఈనాడు, ఏలూరు: తలా రూ.500 నోటు. మగవారికి మద్యం సీసా. బిర్యానీ పొట్లం. ఊరూరా జనాన్ని తరలించేందుకు 1,200 బస్సులు. ఎక్కడెక్కడి నుంచి ఎంతమందిని రప్పించాలో నాయకులకు టార్గెట్లు. ఇంతచేసినా తీరా అధినేత ప్రసంగించే వేళ సభా ప్రాంగణం జనం లేక బోసిపోయింది. భీమవరంలో మంగళవారం సీఎం సభ కోసం ఉమ్మడి పశ్చిమ గోదావరి జిల్లా  నుంచి భారీగా తరలించారు.

మూడో వంతు జనం బస్సుల్లోంచి దిగకపోగా, దిగిన వారు సభా ప్రాంగణంలో నిల్చోలేకపోయారు. బస్సుయాత్ర సభా వేదిక వద్దకు చేరుకుంటుండగానే.. జనాలు పెద్ద సంఖ్యలో వెళ్లిపోతూ కనిపించారు. జగన్‌ ప్రసంగించేటప్పుడు కొన్ని గ్యాలరీలు ఖాళీ అయ్యాయి. అక్కడే మందుబాబులు మద్యం తాగుతూ కనిపించారు.