శ్రీవారి ఆలయంలో వైభవంగా శ్రీరామనవమి ఆస్థానం

తిరుమల, న్యూస్‌టుడే: శ్రీవారి ఆలయంలో శ్రీరామనవమి ఆస్థానాన్ని పురస్కరించుకుని శ్రీసీతారామలక్ష్మణ సమేత హనుమంతులవారి ఉత్సవర్లకు స్నపన తిరుమంజనాన్ని బుధవారం వైభవంగా నిర్వహించారు. ఈ సందర్భంగా ఆలయంలో ప్రత్యేక కార్యక్రమాలు చేపట్టారు. ఉదయం సుప్రభాతంతో స్వామివారిని మేల్కొలిపి తోమాల సేవ, అర్చన అనంతరం రంగనాయకుల మండపంలో ఉదయం 9 నుంచి 11 గంటల వరకు స్నపన తిరుమంజనం కనులపండువగా నిర్వహించారు. సాయంత్రం 6.30 నుంచి రాత్రి 8 గంటల వరకు హనుమంత వాహనంపై శ్రీరామచంద్రమూర్తి అలంకారంలో శ్రీమలయప్పస్వామి కొలువుదీరి భక్తులను కటాక్షించారు. రాత్రి 9 నుంచి 10 గంటల నడుమ బంగారు వాకిలి వద్ద శ్రీరామనవమి ఆస్థానాన్ని పండితులు చేపట్టారు. గురువారం సాయంత్రం 5 గంటలకు శ్రీ సీతారామ లక్ష్మణ సమేత హనుమంతులవారి ఉత్సవర్లకు సహస్ర దీపాలంకార సేవ.. రాత్రి 8 నుంచి 9 గంటల మధ్య బంగారు వాకిలి చెంత ఆలయ అర్చకులు శ్రీరామ పట్టాభిషేక మహోత్సవాన్ని వైభవంగా నిర్వహిస్తారు. కార్యక్రమంలో శ్రీ పెద్దజీయర్‌, తితిదే ఈవో ఏవీ ధర్మారెడ్డి దంపతులు, ఆలయ డిప్యూటీ ఈవో లోకనాథం, ఇతర అధికారులు పాల్గొన్నారు.