మాచర్లలో కూలిన వసతిగృహం గోడ

విద్యార్థినులకు త్రుటిలో తప్పిన పెనుప్రమాదం

మాచర్ల గ్రామీణ, న్యూస్‌టుడే: పల్నాడు జిల్లా మాచర్ల రింగురోడ్డు ప్రాంతంలోని ప్రభుత్వ సాంఘిక సంక్షేమ బాలికల వసతిగృహం భవనంపై ఉన్న పిట్టగోడ్డ గురువారం మధ్యాహ్నం ఒక్కసారిగా కూలి కిందపడింది. అప్పుడే పరీక్షలు రాసి పాఠశాలల నుంచి వసతిగృహానికి చేరుకున్న విద్యార్థినులు ఆ దృశ్యాన్ని చూసి భయపడి బోరున విలపించారు.

గోడ కూలిన సమయంలో దాని సమీపంలోనే కొంతమంది విద్యార్థినులు ఉన్నారు. రెండు నిమిషాలు ఆలస్యమైతే అటువైపు వెళ్లే వాళ్లమని, ఆ పరిస్థితి ఊహించుకుంటేనే భయంగా ఉందని వారు వాపోయారు. కూలిన శబ్దానికి చుట్టుపక్కల వారు సైతం భయాందోళనకు గురయ్యారు. కాగా ప్రమాదం జరిగినప్పుడు వసతిగృహంలో వార్డెన్‌, వాచ్‌మెన్‌లు ఎవరూ లేరు. ఘటనపై వార్డెన్‌ సుమని మాట్లాడుతూ.. వసతిగృహం విద్యార్థినులకు అనువుగా లేదని, శిథిలావస్థకు చేరడంతో ఉన్నతాధికారులకు ప్రతిపాదనలు పంపామని తెలిపారు.