మంచాలలో ప్రబలిన అతిసారం

వంద మందికిపైగా అస్వస్థత

చేబ్రోలు, న్యూస్‌టుడే: గుంటూరు జిల్లా చేబ్రోలు మండలం మంచాల గ్రామంలో అతిసారం ప్రబలింది. ఇక్కడ సుమారు 100 మందికి పైగా గురువారం రాత్రి నుంచి వాంతులు, విరేచనాలతో బాధపడుతున్నారు. కొంతమంది తీవ్ర అస్వస్థతకు లోను కావడంతో వారిని గుంటూరు, వడ్లమూడి, చేబ్రోలులోని ప్రైవేటు ఆసుపత్రులకు తరలించారు. మరికొంతమంది స్థానిక ఆర్‌ఎంపీ సహాయంతో ఇంటి వద్దే వైద్యం పొందుతున్నారు. బాధితులంతా పొలం పనులు చేసుకునే కూలీలే. ఈ నేపథ్యంలో శుక్రవారం స్థానిక సచివాలయం వద్ద వైద్య శిబిరం నిర్వహించారు. గ్రామానికి చేరుకున్న జిల్లా వైద్యాధికారి విజయలక్ష్మి మాట్లాడుతూ అతిసారం ప్రబలడానికి గల కారణాలను గుర్తిస్తున్నామన్నారు. ఇటీవల ఆలయం వద్ద అందించిన పానకాన్ని నిల్వ ఉంచి తాగడం వల్ల వాంతులు, విరేచనాలు అవుతున్నాయని ప్రాథమికంగా అంచనాకు వచ్చినట్లు వెల్లడించారు.