మల్లన్న సేవలో సుప్రీంకోర్టు న్యాయమూర్తి జస్టిస్‌ జె.కె.మహేశ్వరి

శ్రీశైలం ఆలయం, న్యూస్‌టుడే: శ్రీశైలం మహాక్షేత్రంలో కొలువైన భ్రమరాంబ మల్లికార్జున స్వామివార్లను సుప్రీంకోర్టు న్యాయమూర్తి జస్టిస్‌ జె.కె.మహేశ్వరి దంపతులు ఆదివారం దర్శించుకున్నారు. వీరికి ముందుగా ఆలయ మహాద్వారం వద్ద దేవస్థానం ఈవో డి.పెద్దిరాజు స్వాగతం పలికారు. అనంతరం న్యాయమూర్తి దంపతులు స్వామివార్లకు రుద్రాభిషేకం, అమ్మవారికి కుంకుమార్చన చేశారు. ఈ సందర్భంగా న్యాయమూర్తి దంపతులకు అమ్మవారి ఆలయ ప్రాంగణంలో అర్చకులు, వేదపండితులు వేదాశీర్వనాలు, ఈవో స్వామివార్ల శేషవస్త్రాలు, ప్రసాదాలు అందజేశారు. న్యాయమూర్తి వెంట కర్నూలు జిల్లా న్యాయమూర్తి ఎన్‌.శ్రీనివాసరావు, నంద్యాల జూనియర్‌ సివిల్‌ జడ్జి వి.ఆదినారాయణ, ఆత్మకూరు డీఎస్పీ ఎ.శ్రీనివాసరావు పాల్గొన్నారు.