శ్రీవారి సర్వదర్శనానికి 30 గంటలు

సర్వదర్శనానికి రింగ్‌రోడ్డులోని శిలాతోరణం వరకు క్యూలైన్‌లో వేచిఉన్న భక్తులు

తిరుమల, న్యూస్‌టుడే: తిరుమల శ్రీవారి సర్వదర్శనానికి శుక్రవారం భక్తులు పోటెత్తారు. దర్శనానికి దాదాపు 30 గంటలకుపైగా సమయం పడుతోంది. ఎస్‌ఎస్‌డీ టోకెన్లు లేకుండా శుక్రవారం సాయంత్రానికి క్యూ లైన్లలో వచ్చిన భక్తులతో వైకుంఠం క్యూ కాంప్లెక్స్‌-2లోని కంపార్ట్‌మెంట్లు, నారాయణగిరి షెడ్లు నిండిపోయాయి. రింగ్‌ రోడ్డులోని గోగర్భం డ్యామ్‌ కూడలి వరకూ భక్తులు లైన్‌లో వేచి ఉన్నారు. దీంతో సాయంత్రం నుంచి కొత్తగా వచ్చే భక్తులను సర్వదర్శనం క్యూలైన్‌లోకి అనుమతించలేదు.  శనివారం ఉదయం 6 గంటలకు క్యూ లైన్ల వద్దకు రావాలని అధికారులు సూచిస్తున్నారు. మరోవైపు తిరుమలలో మధ్యాహ్నం నుంచి వర్షం కురుస్తోంది. చలి కూడా పెరిగింది. క్యూ లైన్‌లోని భక్తులకు తితిదే తాగునీరు, అన్నప్రసాదం అందిస్తోంది. గురువారం శ్రీవారిని 76,369 మంది భక్తులు దర్శించుకున్నారు. గదుల కోసం రద్దీ కొనసాగుతోంది.