‘ఈ-ఆఫీస్‌’ అప్‌గ్రేడ్‌ ప్రక్రియ వాయిదా

ఈనాడు, అమరావతి: రాష్ట్రంలో ఈ-ఆఫీస్‌ అప్‌గ్రేడ్‌ ప్రక్రియను వాయిదా వేయాల్సిందిగా ఎన్నికల సంఘం ఆదేశించింది. ప్రభుత్వ కార్యాలయాల్లో శుక్రవారం సాయంత్రం నుంచి ఈ ప్రక్రియ ప్రారంభించాలన్నది ప్రభుత్వ ఆలోచన. ఎన్‌ఐసీ అందుకోసం ఏర్పాట్లు చేసింది. కానీ, రాష్ట్రంలో ఎన్నికల ఫలితాలు వెలువడేందుకు కొన్ని రోజుల ముందు ఈ-ఆఫీస్‌ అప్‌గ్రేడ్‌కు పూనుకోవడంపై పలు అనుమానాలు వ్యక్తమయ్యాయి. ఈ పేరుతో ప్రభుత్వ కార్యాలయాల్లోని కీలక దస్త్రాల్ని మాయం చేసేందుకే వైకాపా ప్రభుత్వం సిద్ధమైందన్న ఆరోపణలు వచ్చాయి. అప్‌గ్రేడ్‌ ప్రక్రియను నిలిపివేయాలని గవర్నర్‌ జస్టిస్‌ అబ్దుల్‌ నజీర్, రాష్ట్ర ప్రధాన ఎన్నికల అధికారి ముకేశ్‌కుమార్‌ మీనాలకు తెదేపా అధినేత చంద్రబాబు లేఖలు రాశారు. ఈ నేపథ్యంలో ఎన్‌ఐసీ ప్రతినిధుల్ని పింపించి మీనా ఆరా తీశారు. ప్రతిపక్షాల ఫిర్యాదు నేపథ్యంలో దాన్ని వాయిదా వేయాలని ఆయన ఆదేశించారు. తదుపరి షెడ్యూల్‌ను మళ్లీ విడుదల చేస్తామని, అప్పటి వరకు పాత ఈ-ఆఫీస్‌ వెర్షన్‌తోనే విధులు నిర్వర్తించాలని ప్రభుత్వ శాఖలకు ఆదేశాలు జారీ చేశారు.