రేణిగుంట విమానాశ్రయంలో ప్రయాణికుల నిరసన

రేణిగుంట, న్యూస్‌టుడే: తాము వెళ్లాల్సిన విమాన సర్వీసును రద్దుచేయడంతో రేణిగుంట విమానాశ్రయంలో ప్రయాణికులు ఆందోళనకు దిగారు. రేణిగుంట నుంచి కర్ణాటకలోని కలబురిగికి స్టార్‌ ఎయిర్‌లైన్స్‌ విమానం సోమవారం సాయంత్రం 4.20కి బయలుదేరాలి. 32 మంది ప్రయాణికులు నిర్ణీత సమయానికి అక్కడికి చేరుకున్నాక సర్వీసును రద్దుచేసినట్లు సిబ్బంది చెప్పడంతో వారు ఆందోళనకు దిగారు. ముందస్తు సమాచారం లేకుండా ఎలా రద్దుచేశారని సిబ్బందిని ప్రశ్నించారు. తర్వాత అక్కడి ఎయిర్‌లైన్స్‌ టికెట్‌ కౌంటర్‌ ముందు నిరసన చేపట్టారు. సిబ్బంది పట్టించుకోకపోవడంతో తీవ్ర ఆగ్రహం వ్యక్తంచేశారు. కాసేపటికి సిబ్బంది.. టికెట్‌ డబ్బులు తిరిగి చెల్లిస్తామని లేదా మరో సర్వీసులో పంపిస్తామని చెప్పడంతో శాంతించారు. ఈ ఘటనపై ఉన్నతాధికారులకు ఫిర్యాదు చేస్తామని కొందరు ప్రయాణికులు తెలిపారు.