బకాయిలు చెల్లించనందున.. మెరుగైన వైద్యాన్ని అందించలేకపోతున్నాం

ఆశా వెల్లడి

ఈనాడు, అమరావతి: ప్రభుత్వం నుంచి బకాయిల చెల్లింపులు సక్రమంగా జరగకపోతుండడంతో.. ప్రజలకు మెరుగైన వైద్యాన్ని అందించలేకపోతున్నామని ఆంధ్రప్రదేశ్‌ స్పెషాలిటీ హాస్పిటల్స్‌ అసోసియేషన్‌(ఆశా) వెల్లడించింది. ఆరోగ్యశ్రీ కింద రోగులు, ఉద్యోగులకు సేవల నిలిపివేతపై గురువారం ఓ ప్రకటన జారీచేసింది. ‘ఆరోగ్యశ్రీ అనుబంధ ఆసుపత్రులకు రూ.1,500 కోట్లకుపైగా బకాయిల చెల్లింపులు జరగాలి. ఇందులో కేవలం రూ.203 కోట్ల విడుదలకు మాత్రమే రాష్ట్ర ప్రభుత్వం చర్యలు తీసుకుంటోంది. సుమారు 8 నెలల నుంచి ప్రభుత్వం నుంచి చెల్లింపులు జరగనందువల్ల ఆసుపత్రుల నిర్వహణ కష్టంగా మారింది. సిబ్బందికి కొన్ని ఆసుపత్రుల యాజమాన్యాలు వేతనాలు కూడా చెల్లించలేకపోతున్నాయి. వెంటనే రూ.800 కోట్ల విడుదలకు చర్యలు తీసుకోవాలని ఆరోగ్యశ్రీ సీఈఓను కోరాం’ అని తెలిపింది. కాగా పలు ఆసుపత్రుల్లో ఆరోగ్యశ్రీ సేవలకు అక్కడక్కడ అంతరాయం ఏర్పడుతుండగా.. దీనిపై నెలకొన్న గందరగోళం రోగులను ఆందోళనకు గురిచేస్తోంది.