తిరుమలలో కొద్దిగా తగ్గిన భక్తుల రద్దీ

తిరుమల, న్యూస్‌టుడే: తిరుమల శ్రీవారి సర్వదర్శనానికి భక్తుల రద్దీ ఆదివారం ఉదయం కొంత తగ్గింది. ఎటువంటి దర్శన టికెట్లు లేకుండా తిరుమలకు వచ్చిన భక్తులు సాయంత్రానికి వైకుంఠం క్యూ కాంప్లెక్స్‌లోని కంపార్ట్‌మెంట్లు, నారాయణగిరి షెడ్లు నిండిపోయి కృష్ణతేజ అతిథిగృహం వరకు క్యూలైన్‌లో వేచి ఉన్నారు. వీరికి దాదాపు 20 గంటల్లో శ్రీవారి దర్శనం లభించనుందని తితిదే తెలిపింది. రూ.300 ప్రత్యేక దర్శనం టికెట్లు కలిగిన భక్తులకు కనీసం 2 నుంచి 3 గంటల సమయం పడుతోంది. శనివారం 83,866 మంది భక్తులు దర్శించుకోగా రూ.4.15 కోట్ల హుండీ కానుకలు లభించాయి.