కూటమికి జై కొట్టిన ముస్లిం మైనారిటీలు

ఈనాడు, అమరావతి: ఎంత అన్యాయం చేసినా.. వారి అభివృద్ధికి ఏ మాత్రం సహకరించకపోయినా మాటలతో మభ్యపెట్టొచ్చు అనేలా ముస్లింల పట్ల వ్యవహరించిన జగన్‌కు వారు బుద్ది చెప్పారు. పాలనలో అడుగడుగునా చేసిన అన్యాయానికి వారు ఓటుతో ప్రతీకారం తీర్చుకున్నారు. వైకాపా అరాచకశక్తులు ముస్లింలపై దాడులకు తెగబడుతున్నా.. కళ్లప్పగించి చూసిన ఆయనకు సమయం వచ్చినప్పుడు తాము ఎలా ప్రతిస్పందిస్తామో చూపించారు. వైకాపాకు పట్టుండే రాయలసీమ ప్రాంతంలోనూ ఆ పార్టీ వెన్నువిరిచారు. రాష్ట్రవ్యాప్తంగా 35 వేల మంది ముస్లిం ఓటర్లున్న 20 నియోజకవర్గాలను ప్రాతిపదికగా తీసుకుంటే.. ఒక్కచోట కూడా వైకాపా గెలుపొందలేదు. వారి జనాభాకు అనుగుణంగా 70శాతం మంది ఓటర్లుంటారని అంచనా. ఆ ప్రకారం ఉమ్మడి కృష్ణా, గుంటూరు, నెల్లూరు, కర్నూలు, కడప, చిత్తూరు జిల్లాల్లో.. అత్యధికంగా మైనారిటీ ఓట్లున్న నియోజకవర్గాలున్నాయి. విజయవాడ పశ్చిమ నియోజకవర్గం మొదలు హిందూపురం వరకు అన్నిచోట్ల ఒకే ట్రెండ్‌ కొనసాగింది.